КӘСІПКЕРЛІККЕ КЕҢ ӨРІС АШЫЛУДА

         Күз айының алғашқы күнінде Президентіміз Қ.К.Тоқаевтың ел халқына арнаған «Әділетті Қазақстанның экономикалық бағдары» атты Жолдауында маған кәсіпкерлерге қамқорлық жасаған жерлер ұнады. Себебі, өзім негізгі жұмысымнан бөлек, мал өсіру ісімен айналысып, бірнеше мал ұстайтын едім. Олардың сүт өнімдері мен еттерін сатып, қосымша табыс табудамын. Ал келешекте шағын бизнесімді өркендету жоспарым бар.

          Мемлекет басшысының:  «Енді орта кәсіпкерлікті дамыту мәселесіне тоқталғым келеді. Соңғы жылдары қабылданған шаралардың арқасында шағын және ірі бизнес тұрақты дами бастады. Алайда орта кәсіпкерліктің даму қарқыны әлі де бәсең. Жаңа экономикалық үлгіге көшу үшін оны «қолмен көтеруге» тура келеді.

           Ең алдымен, орта бизнестің дамуын тежеп тұрған кедергілерді жою қажет. Орта кәсіпкерліктің басым бөлігі әбден дамыған кезде бөлшектеніп кетеді. Өйткені оларға шағын бизнес деңгейінде қалған әлдеқайда «қолайлы». Үкімет шағын бизнесті өзара бірігіп, ірі кәсіп иелері болуға ынталандыру үшін заңға өзгерістер енгізуі керек.

          Еліміздің нарығында белсенді жұмыс істеп жатқан табысты орта кәсіпорындар көп емес. Оларға қолдау көрсету қажет. Мұндай кәсіпорындардың әрқайсысына қатысты нақты жоспар әзірлеу керек. Сол арқылы олардың өндіріс қабілетін арттырып, өнім көлемін екі-үш есе көбейту қажет.

         «Бизнестің жол картасы» және «Қарапайым заттар экономикасы» бағдарламаларын біріктірген жөн. Оны шағын және орта кәсіпкерлікті қолдайтын кешенді бағдарламаға айналдыру керек.

           Мемлекеттік қолдау шараларын өндірістің технологиялық күрделілігіне және бизнестің нақты түріне қарай жіктеу маңызды. Оның операциялық тиімділігі жоғары болуы да өте маңызды. Сондықтан «Бәйтерек» холдингінің құрылымын өзгертіп, оны кең ауқымда цифрландырған жөн.

          Экспортты ұлғайтуға айрықша мән беру керек. Оның әдіс-тәсілдері болғанымен, жүйелі ұстаным жоқ. Осы орайда, KazakhExport компаниясы экспортты дамытатын толыққанды институтқа айналады. Компанияға осы міндетті атқаруға қажетті құзырет берілуге тиіс. Бұдан бөлек, «Отбасы банктің» қызметін қайта қарау керек. Басты назарды облыс орталықтарына емес, аудандарға, моноқалаларға және ауылдарға аударған жөн»-сөзі дәл бүгінгі заманның талабына сай келетін дүние деп ойлаймын.

         Енді осы Жолдауда айтылғандай біз секілді шағын бизнеспен айналысушыларға қолайлы жағдайлар жасалса, онда тек біздің ғана емес, сонымен бірге ауылдың жағдайын оңалып, жаңа жұмыс орындары ашылар еді деп ойлаймын.

Мәулен НӘЛІБАЕВ,

Жетісай ауданы, Ш.Ділдәбеков ауылдық округінің тұрғыны.