«АРХИВ ЖӘНЕ БОЛАШАҚ ҰРПАҚ»

          Қазақстан Республикасы Мәдениет және спорт министрлігінің Архив, құжаттама және кітап ісі комитеті 2022 жылғы 26 тамыздағы Архив мекемелерімен республикалық кеңесі хаттамасының 4-тармағына және 2022 жылғы 5 қыркүйекте бекітілген тұжырымдамаға сәйкес жыл сайын 21 қыркүйек күні «Архив және болашақ ұрпақ» жобасын өткізу туралы шешім қабылдаған болатын.

         Осы жоба аясында Мақтаарал ауданы, Атакент кентінде орналасқан Жетісай өңірлік мемлекеттік архивінде 2023 жылдың 21 қыркүйегінде «Ашық есік» күні өткізілді.

         Ашық есік күніне Жетісай ауданының мамандандырылған «Дарын» мектеп-интернаты» КММ, Мақтаарал аудандық білім бөлімінің «№ 5 Мақтаарал-мектеп гимназиясы» КММ, «Қ.Сәтбаев атындағы № 6 жалпы орта мектебі» КММ, «В.Комаров атындағы № 7 жалпы орта мектебі» КММ және А.Байтұрсынұлы атындағы жалпы орта мектебі» КММ ұстаздары мен оқушылары қатысты.

          Қатысушыларға архив қызметінің қоғамда алатын орны, міндеттері мен мақсаттары түсіндірілді, архив қызметкерлерінің күнделікті тыныс тіршілігімен, қор сақтау қоймаларындағы құжаттардың орналасу және сақталу тәртіптерімен танысты. Архив қоймаларына экскурсия жүргізіліп, құжаттар көрмесі ұйымдастырылды.

         Жетісай ауданының мамандандырылған «Дарын» мектеп-интернатының оқушылары тарих пәнінің мұғалімі Алтынай Молдадосова апайдың жетекшілігімен бірнеше жылдан бері ауданымыздың тарихына қатысты іздену жұмыстарын архив құжаттары негізінде жүргізіп, дайындаған ғылыми жобаларымен облыстық және республикалық байқаулардан жүлделі орындар алып келуде.

         Ашық есік күніне қатысушыларды «Дарын» мектеп интернатының оқушылары Мырзашөл өңіріне қатысты архив құжаттары негізінде дайындаған ғылыми жобаларымен қысқаша таныстырды. Іс-шараға қатысқан ұстаздар мен оқушылар архив қызметкерлеріне ризашылықтарын білдіріп, осын кездесулерді жиі ұйымдастырып тұруды сұрады.

           Жетісай өңірлік мемлекеттік архивінде «Архив және болашақ ұрпақ» тақырыбындағы өткен ашық есік күніне жалпы 80-нен астам оқушы қатысты.

Пакизат КАДЫРБЕКОВА,

Жетісай өңірлік мемлекеттік архивінің архивисі.