ТӘУ ЕТІП СҮЙГЕН БАЙРАҒЫМ, ТӘУЕЛСІЗДІК ТӘУ ТАҒЗЫМ!

           Қанша ақын болсын, қаншама төл перзент болсын – Тәуелсіздік ұғымы әсте қайсымызға да аса бек қымбат екені жүмле жұртқа аян.

           Күні кеше ғана, біздің оқу ордамызда бір жап – жарық кеш болды десек еш асылық айтқандық емес. Олай деуіміздің жарқын себебі, осы аталмыш Гимназияның мақтаныш Түлегі, Әдебиет майданына өзіндік ерек стильімен келген ақын, аудармашы, жас ғалым – Ерік Қайратбекұлы Омарғалиев таяу арада тарихи есімді жамылған, ескінің көзіндей сақталған, Семейдің көне кітап баспа үйі – «Жәрдем» баспасынан жарық көрген «Тәңірмен тілдесу» әлем әдебиеті аудармалары өлең кітабымен жырсүйер көпшілікпен, талапкер оқушы, ұлағат ұстаз қауымды бір реттен таныс ете келіп және орайы Тәуелсіздік мерекесі күніне тұспа – тұс келіп қалған ұлық күнге арнайы ұйымдастырылып ақын қонақ ретінде шақырылып өзінің жүрекжарды ақжарма жырларымен екінші үйі атанған оқу ордасын жыр жаңалығы мен рухани өрісті ойлар легін ағылтып тамсағаны рухымызды серпілтті де.

     Осы кеш барысында оқушылар кезек – кезегімен ақынның алғадай жырларын жосылта жатқа мәнермен оқып, алма – кезек түлек ақын жайындағы өз көкейлеріндегі сәулелі сұрақтарына тұшымды жауаптарын ала алды.

    Ақынның мектептегі бозбала шақ қызық – шыжықтарын әдебиет пәні мұғалімі Нұрғамысова Шолпан Махмұтқызы жіпке тізгендей мөлдіретіп тұрып аңыз – афсана кейіпкері еткендей әсерлі әңгіме әуезінде толғамды ойын ақтара, әрі талант шәкіртімен мақтана айтып берді. Оқушылар, ақынға алғыстарын білдіріп, кеш соңында әдеттегі кешіміздің қонағымен естелік рәсімге түсті. Ұстаз тараптан ақындық ақ жолына сәт сапар тілек іспетті «Былғары күнделік», «Әртістік қырлы» үлкендеу қалыптағы фотосуретті сыйға тартып, ақынның тебіреністі «Тәуелсіздік» және де Әлем әдебиеті аудармалары жинағының басты бетіндегі түркі тілдес Әзірбайжан халқының ақыны Аббас Сәххаттан бір үзік жыр – «Отан» тақырыбындағы толғау – жырымен… сондай рухты да тамаша салмақты арнада есте қаларлықтай аяқталды.

     «Тәуелсіздік» «Тумасынан» – »Тұлғасына» айналған, ойы тұлпардай жүйрік, сойы елге таныла бастаған ақынның тек қана алға ұмтылып, келешекке еңбек етіп, шығармашылық бөлек әлемімен бүткіл алашты қуантқаны біздерге үлкен мәртебе, бүтін бақыт риясындай болып көрінеді.

       Айтпақшы, «Тәңірмен тілдесу» әлем әдебиеті аудармалары жыр жинағы «Дарын» мемлекеттік жастар сыйлығына ұсынылған көркем әдеби туынды. Ол туындысын да автор ақын өзі жақсы көрген кітапхана сөресіне қолтаңбасымен сыйлады.

     Ақынға тек өлең мен өнер жолы жарық болсын демекпіз!

Руслан КӘРІПБАЕВ, 
«Ыбырай Алтынсарин» атындағы № 37 гимназияның
қазақ тілі мен әдебиеті пәнінің мұғалімі. Семей қаласы.