БІЗ ӘЛЕМДІ ӨЗГЕРТЕМІЗ, ЗОРЛЫҚСЫЗ ӘЛЕМДІ ҚАЛАЙ ҚҰРУҒА БОЛАДЫ?

          Зорлық-зомбылық деңгейінің жыл сайын арта түсуі,адамдардың бір-біріне қатігез болып, жанашырлық танытпауы толғандырады.Осы әрекеттердің бастамасы отбасында басталады деп санаймын. Оған отбасындағы ата-ана арасындағы ұрыс-керіс, эмоциялық зорлық,балаларды анасына немесе әкесіне қарсы қою т.б жағдайлары басты фактор болып табылады.

          Әйелдер мен балалар осындай тұрмыстық зорлық-зомбылықтың құрбанына айналуда. Отбасындағы зорлық зомбылыққа өгей ана немесе өгей әкелер себеп болып жатады. Сол себепті де бала дүниеге жоспарлы түрде келуі қажет деп ойлаймын. Қоғамда өз баласынан безіп,далаға тастап күнә жасап жатқан аналар қаншама? Өз анасына керек болмаған бала өзгеге керек болар ма? Жастайынан ата-анасының мейірімділігін көріп,тал бесікте жатқанында-ақ дұрыс тәрбие көрмей, тек біреудің балағаты мен қатігездігін көріп өскен баланың болашағы не болмақ? Жасынан өмірдің ащы тұстарын,зорлық-зомбылық көріп,белі бесіктен шыға сала қара жұмысқа таңылған, дұрыс жасамаған әрекеті үшін таяқ астына қалған балаларды есіме аласам, жүрегім ауырады. Онымен қоса, қоғамдағы зорлық зомбылықтың басты себебі:алкоголь ішімдіктері деп ойлаймын.Ішімдікке тойып алған кейбір әкелер үйге келіп, балалары мен әйеліне түрлі зорлық-зомбылық көрсетіп, отбасының ойран топырын шығаруда. Сөзге келіспей қалған жағдайда  күш көрсетіп, қол жұмсайтын, таяқ астына алып, бүкіл денесін көгертіп,ауыр халге жеткізетін ақымақтар дәл қазір қоғамда толып жүр. Осы ұрыс-керіс арасында өскен бала да өскенде зорлық-зомбылықтың себепшісіне айналары сөзсіз.

          «Ұяда не көрсең, ұшқанда соны ілерсің «демекші,бала тал бесікте жатқанында-ақ дұрыс тәрбие алып,мейірімділік пен қамқорлыққа куә болып,оны сезініп, өзгелерге де жанашыр болып өсуі қажет деп ойлаймын. Біз әлемді тек мейірімділік пен бір-бірімізге деген түсіністіктің арқасында ғана өзгерте аламыз.

Гүлбану КАРАМАНОВА,

 С.Датұлы атындағы №23 жалпы білім беретін мектебінің 7«ә» сынып оқушысы.

Жетекшісі: Сисенгүл АМИРХАНОВА.