ТУҒАН ЖЕР КҮНІ ҚҰТТЫ БОЛСЫН!

        Ардақты ағайын, Алаш ұрпағы!
        Сіздерді Ұлт құндылықтарын сақтау мен насихаттауға бағытталған Қазақ күнтізбесінің айшықты күні 24-26 тамыз – Туған жер күнімен құттықтаймын!

       1847 жылы Қазақ хандығы біржола ыдырап, тарих сахнасынан түсуінен тура 70 жыл өткен 1917 жылдың желтоқсанында Алаш Республикасы атауымен туы қайта көтерілген Қазақ ұлттық мемлекетінің территориясы 9 облыс, бір гүберне, Закаспий облысының Маңғышлақ, Алтай өңірінің Бийскі, Змеиногор және Барнауыл ояздарын қамтып, жалпы аумағы 3,45 млн шаршы шақырымды құрады.

      Қайта жаңғырған ұлттық мемлекеттің осы жерін Әлихан Бөкейхан одан 7 жыл бұрын – 1910 жылы Санкт-Петерборда жарық көрген әйгілі «Қазақтар» атты тарихи очеркінде айқындап қойған болатын. 1917 жылдың 12 желтоқсанында (қазіргі күнтізбе бойынша 25 желтоқсан) ІІ Жалпыұлттық Қазақ-Қырғыз құрылтайы осы облыс-ояздарды Алаш Республикасының заңды жер аумағы деп жариялады.

       Алаш Республикасын жойып, орнына Қазақ аутономиялық кеңестік социалистік республикасы болып қайта құрылатын 1920 жылдың тамыз айында «Алаш» арысы Әлихан Бөкейхан Ахмет Байтұрсынұлы мен Әлімхан Ермекұлын алға салып, кеңес өкіметінің көсемі В.И. Лениннің алдында осы облыс-ояздар қазақ халқының ата-бабадан қалған тарихи меншікті жері екенін дәлелдеп, Тәуелсіз Қазақстан Республикасының қазіргі жер аумағын – территориясын қорғап, бекітіп алды.

        Міне биыл қазіргі мемлекеттік шекарамыздың бекітілгеніне 104 жыл толып отыр.

        Алаш азаматтары! Жеріміз түгел, аспанымыз ашық, еліміз тыныш болсын!

Игі тілекпен, Сұлтан Хан Аққұлы!