“ЖЕТІСАЙ ҰЛТТЫҚ СПОРТ КЛУБЫ” МҮШЕСІ ЕРБОЛАТ АЙТУҒАН ЕЛ ЧЕМПИОНАТЫНДА ЕРЛЕДІ

         Ат тұяғының дүбірін естісе делебесі қозып, тақымын қыспайтын қазақ жоқ. Өйткені, ықылым заманнан-ақ жауынгерлік өнерді жанына серік еткен халқымыз үшін көкпар – жігіттердің күш-жігерін, төзімділігін, батылдығы мен ептілігін, ат үстінде мығым отыруын қалыптастырып, арғымақтың қалай бапталып-үйретілгенін, жүйріктігін сынайтын спорт түрі.

         Соңғы кездері елімізде ерекше көңіл бөлініп, мемлекеттік деңгейде қамқорлықтар көрсетіліп келе жатқан ұлттық ойынымызды дәріптеу мақсатында Шымкент қаласында өткен 2007 – 2009 жылы туылған жасөспірімдер арасындағы XII Қазақстан Республикасының чемпионатында Түркістан құрамасының мерейі үстем болып, чемпион атанды.

         Облысымыздың тақымы мен білегі мықты жігіттерінен құрылған 14 команда қатысқан байрақты бәсекенің ақтық сынында Шымкент құрамасымен күш сынасқан Түркістан құрамасы 5:3 есебімен жеңіске жетті.

         Айта кетерлік жәйт, жеңіске жеткізген 5 салымның 3-ін “Жетісай ұлттық спорт клубының” мүшесі, жас шабандоз, аталмыш чемпионаттың “Үздік шабуылшысы” атанған Ерболат Айтуған салды.

          «V дүниежүзілік көшпенділер ойынында» көкпардан жеңіспен оралған Қазақстан ұлттық құрамасының мүшесі, жерлесіміз Абылайхан Нышанбековпен қатар Орталық Азия халықтары арасында кең тараған ойын түрімен бүгінде ауданда 2 мыңға тарта азамат шұғылданады.

Бауыржан НАЙМАНОВ,

Жетісай ауданы.