ЕЛІНЕ ЕҢБЕГІ СІҢГЕН ТҰЛҒАЛАР

         Жуырда біздің «Кенесары хан атындағы №62 жалпы білім беретін мектеп» коммуналдық мемлекеттік мекемесінде «Мамандығым – болашығым» жобасы аясында «Еліне еңбегі сіңген тұлғалар» тақырыбында әртүрлі мамандық иелері мен жоғары сынып оқушылары арасында кездесу өткіздік. Бұл іс-шарамызға – ардагер-ұстаздар Жумахан Альбаев пен Сайдықыз Абдрахманова, механизатор Алтынай Жиенбаева, электр энергия саласының маманы Сапарқұл Сулеев, аудандық мәслихат депутаты Азамат Қожабаевтар сыйлы қонақ ретінде қатысты.

       Осы шарамыздың мақсаты: жоғары сынып оқушыларына мамандықты дұрыс таңдай білуге, өзінің қабілетін, бейімін, қызығушылығын, мамандыққа сай тани білуге бағыт-бағдар беру болды.

         Кездесуді аша отырып, мен «Мамандық таңдау – тек оқу мен диплом алу ғана емес, бұл – өз өмір жолыңды дұрыс таңдау. Шынайы көзқараспен қарайтын болсақ, дұрыс таңдалған мамандық иесі қашанда өз ісінің шебері, әрі білгірі болып, қашанда сұранысқа ие болып жатады. Ол өз таңдаған бағытын жақсы көріп, сол саланың мақтанышына айнала алады. Соымен бірге, кез келген мамандықтың өзіндік ерекшеліктері мен талаптары болады. Таңдау жасау барысында мамандыққа сұраныс пен оның беделі, мансап перспективалары, еңбек жағдайлары, орташа жалақы сияқты аспектілерді ескеру қажет»-деп мамандықты таңдаудың қаншалықты маңызды екенін, сондықтан бұл мәселеде қателесуге болмайтындығын қысқаша түсіндіріп өттім.

        Өз кезегінде кездесуімізге келген қонақтарымыз, мектебіміздің 9-10-11-сынып оқушыларына өз мамандықтары туралы әңгімелеп, оның қыр-сырымен бөлісті.  «Мамандықты дұрыс таңдау – бұл ұзақ кәсіби өмірде сенімділік, жан тыныштығы және материалдық әл-ауқат. Тек өзіне ғана емес, бүкіл қоғамға қажетті мамандықты таңдап алу керек. Сонда адам кейін өз мамандығы бойынша жұмыс таба алады. Әлбетте, белгілі бір мамандықтың әлеуметтік мәні мен одан моральдық қанағат алуы өте маңызды. Әрбір адамның кез келген саладағы табысқа әсер ететін белгілі бір жеке қасиеті болады. Бұл тамаша есте сақтау, күрделі ойлау, бай қиял және табиғаты бойынша генетикалық және көбінесе тәрбиеге, білімге және өмірлік тәжірибеге байланысты басқа да ақыл-ой қабілеттері болуы мүмкін.

        Мамандықты дұрыс таңдап, қоғамда лайықты орнын табу оңай шаруа емес. Барлық мамандық маңызды. Кейбіреулері математикалық қабілеттерді қажет етеді, басқалары шығармашылықты қажет етеді, енді біреулері дене шынықтыруды қажет етеді. Жақсы немесе жаман мамандық болмайды, тек ұнайтын немесе ұнамайтын мамандық бар. Өмірде бәрі бір-бірімен байланысты болғандықтан, дұрыс мамандық өмірдің барлық саласына әсер етеді. Таңдау неғұрлым сәтті болса, өмір жолы соғұрлым қызықты және табысты болады»- деп оқушыларға болашақ мамандықтарын таңдауда еш қателеспеулері керектіктері туралы, бастысы мамандықты жүрек қалауымен таңдаулары керектігін айтып өтті.

           Кездесудің барысында мектеп оқушылары іс-шара қонақтарына арнап концерттік бағдарлама ұйымдастырып берді.

Айгерім УМИРБЕКОВА,

 «Кенесары хан атындағы №62 ЖББМ» КММ-нің кәсіби бағдар беруші маманы.