ТӘРБИЕ ҰЛТТЫҚ ҚҰНДЫЛЫҚТАРҒА НЕГІЗДЕЛУІ КЕРЕК

        «Әрбір ұлттың баласы өз ұлтының арасында өз ұлты үшін қызмет қылатын болғандықтан, ол сол ұлт тәрбиесімен тәрбиеленуі тиіс», – деп Мағжан Жұмабаев ұлт тәрбиесінің бағытын көрсетіп кеткен еді.

         Қай кезде де елдің болашағы жарқын болуы үшін саналы да, саламатты, ұлтжанды рухы биік, ақыл парасаты мол, мәдени-ғылыми өрісі кең ұрпақ тәрбиелеу қажеттілік болып саналған. Елімізде кейінгі жылдары білім беру жүйесінде жалпы адамзаттық және ұлттық құндылықтарды дамытуды көздеген қарқынды өзгерістер орын алуда. Оның бірқатары өскелең ұрпақтың сана сезімінде ұлттық салт-дәстүрлер мен жалпы адами құндылықтарға негізделген рухани-адамгершілік және әлеуметтік-мәдени дағдыларды қалыптастыруға бағытталған. Осы ретте бүгінде еліміздегі балабақшаларда ұлттық құндылықтар негізінде балаларға тәрбие беруге ерекше назар аударылып, жақсы жұмыстар атқарылуда.

        Осы жерде айта кетерлігі ғалымдарымыз «ертеде қазақтың әр үйінде болған асықтарды тек ойыншық ретінде ғана емес, оны әдіс ретінде балалардың қимыл-қозғалысын реттеуге, кеңістікті бағдарлай білуге, сөздік-логикалық ойлауды сатылай қалыптастыруға, шығармашылық және сын тұрғысынан ойлауға, сабырға, бірлесе әрекет етуге тәрбиелеу құралы ретінде қолдануға болады. Жалпы біз өзіміздің қазақи ойындарымызды негізге ала отырып, жаңа мазмұнды ойындар, жаттығулар құрастырып, бүлдіршіндерді оқыту барысында қолдануымыз керек. Бұл тек ата-бабамыздан келе жатқан құндылықтарымызды дәріптеп қана қоймай, сондай-ақ өзіміздің оқыту әдістерімізді жасап шығаруға үлкен септігін тигізеді, – деген пікірде. Бұл әрине құптарлық пікір.

        Қорыта айтар болсақ, ұлттық құндылықтарды насихаттау мақсатында балабақшаларда тұрақты түрде өтілетін әртүрлі іс-шаралардың арқасында жас буынның бойына ұлттық құндылықтарымыз сіңірілуде. Соның арқасында олардан ұлтжанды азаматтардың өсіп шығары анық.

Орынбек Сымбат Асылханқызы,

«Ерке сұлу» бөбекжай балабақшасының әдіскері. Атакент кенті.