Бородулиха колледжінде «Кітап сыйлау күні» аталып өтті

        14 ақпан – Халықаралық кітап сыйлау күні әлем бойынша кітапқұмарлар мен оқырмандар үшін ерекше мереке саналады. Бұл күн адамдарды кітап оқуға ынталандыруға, оқу мәдениетін насихаттауға және кітап сыйлау дәстүрін қалыптастыруға бағытталған.

         Осы атаулы күнге орай Бородулиха ауданының «Тілдерді оқыту орталығының» директоры Атаева Мейрамгүл Балабайқызы «Бородулиха колледжінің» кітапханасына бірнеше тілдік оқыту кітаптарын сыйға тартты. Бұл бастама білім алушылардың қазақ тілін меңгеруіне ықпал етіп, тіл үйрену үдерісін жеңілдетуге арналған.

         Шара барысында кітапхананың белсенді оқырмандарына да тосын сый жасалып, оларды ынталандыру мақсатында кітаптар тарту етілді. Мұндай игі дәстүр жастардың кітап оқуға деген қызығушылығын арттырып, білім көкжиегін кеңейтуге септігін тигізері сөзсіз.

           Кітап – баға жетпес қазына! Оны сыйлау – білім мен мәдениеттің дамуына қосқан үлес.

Омарғалиев Ерік Қайратбекұлы,
ҚР Журналистер одағының мүшесі