ҰЛТ КЕМЕҢГЕРІНЕ АРНАЛҒАН ЖЫР САЙЫСЫ

         Семей қаласындағы «№ 37 гимназияда» Хакім Абай Құнанбайұлының 180 жылдық мерейтойына орай жас ақындардың өнерін шыңдау, қазақ поэзиясына деген сүйіспеншілігін арттыру мақсатында «БОЛМАСАҢ ДА ҰҚСАП БАҚ…» жыр сайысы өтті. Қазақтың бас ақынын ұлықтау, оның мұрасын жас ұрпаққа насихаттау жолындағы бұл байқау жас таланттарға шабыт сыйлап, өлең өлкесіне қанат қақтырды.

          Жыр додасында «Ақ қауырсын» өнер үйірмесінің жас талап алғыр шәкірттері өзара бақ сынасты. Олардың қатарында: Азалия Увалиева, Адислам Айдосұлы, Інжу Сембай, Нұрсана Арнұрқызы, Нұртілек Нұрлыбекұлы, Назар Асубаев, Кәусар Амирсанова, Ерасыл Сәкенов, Гаухар Мұқаметқали сияқты дарынды жас ақындар бар.

        Сайыс екі кезеңнен тұрды:

       І кезең: «Шабытты жыр шумақтар шуағы»:
Қатысушылар алдын ала дайындаған өз өлеңдерін ұсынып, дана Абайға деген құрметін, туған жерге деген сүйіспеншілігін, ұлттық рух пен терең ойларын жырларына арқау етті.

        ІІ кезең: «Өлеңмен өрнекте ой иірімін»:
Бұл бөлімде жас ақындардың суырыпсалмалық қабілеті сыналды. Әділқазылар алқасы қатысушыларға түрлі тақырыптар ұсынып, небәрі 10 минут ішінде кемінде 3 шумақ өлең жазу тапсырылды. Осылайша, олардың тапқырлығы, көркем ойлауы және жедел шабыттану қабілеті бағаланды.

       Сахна сәніне айналған әсем әндер.

       Жарыс барысында тек өлең ғана емес, көрермендерге тамаша ән шашу да тарту етілді. Қатысушылар мен қонақтар ән мен жыр қатар өрілген әсерлі кештің куәсі болды.

       Жеңімпаздар мен марапаттау сәті.

        Жыр додасының ашылу салтанаты мен қорытынды сөзін «Ыбырай Алтынсарин атындағы № 37 гимназияның» құрметті ұстаздары сөз тізгіндеді.  Олар жас ақындарға ізгі тілектерін білдіріп, шалқар шабыт пен әлеуетті шығармашылық, толайым табыс тіледі.

       Сайыс соңында, әділқазылар шешімімен «Ақ қауырсын» өнер үйірмесінің жас шәкірті, гимназияның 7 – «В» сыныбының оқушысы Сембай Інжу ерекше дарынымен көзге түсіп, «Бас жүлдені» иеленді. Одан бөлек, жүлделі орындарға ие болған барлық қатысушылар және арнайы номинация жеңімпаздарына Дипломдар табысталып, Алғыс хаттармен марапатталды.

       Қорытындылап айтқанда, бұл жыр додасы ақындыққа талпынған жастар үшін үлкен шығармашылық алаң болды. Абайдың өнегелі жолын жалғап, жыр әлеміне бет алған жас талапкерлерге шабытты шақтарың көп болсын! – деген ізгі тілек білдіреміз.

         Жас ақындарға өрісті өнер, жырлы ғұмыр тілейміз! Хакім Абай Құнанбайұлының рухы қолдағай!

Ерік ҚАЙРАТБЕКҰЛЫ,
ҚР Журналистер одағының мүшесі.

Семей қаласы.