ТӘУЕЛСІЗДІГІМІЗ ТҰҒЫРЛЫ КЕЛЕШЕГІМІЗ БАЯНДЫ БОЛСЫН

Қазақстан Республикасының Президенті Қасым-Жомарт Тоқаевтың «Тәуелсіздік бәрінен қымбат» атты мақаласы мені қатты толғандырды. Өткен уақытқа көз жіберсек шынында да Қазақстан Тәуелсіздік алғалы 30 жылға жуық уақыт ішінде биік белестермен асқар асуларды бағындырып,бүкіл дүние жүзіндегі дамыған алпауыт мемлекеттермен терезесі тең жағдайға жетіп, дамып келе жатқанымызға қуанамын.

Еліміз бүгінде бірлік пен достықтың алтын бесігіне айналды.Тәуелсіздік алғалы бері білім, медицина өндірістің қай саласына қарасақта оң өзгерістерді байқайсың. Ауылдарға өзгеше көңіл бөлініп, жастардың терең білім алуына жағдай жасап, олардың жұмыспен қамту мақсатында көптеген бағдарламалар қабылданғандығы баршамызға белгілі. Қарапайым мысал ретінде ауданымыз Мақтааралды айтсақ та болады. Себебі Тәуелсіздігіміздің арқасында Елбасы Тұңғыш Президентіміз Н.Назарбаевтың арнайы тапсырмасы мен халқы көп шоғырланған іріленген Мақтарал ауданын Жетісай, Мақтаарал аудандары деп екі бөлгені үлкен тарихи уақыт және қуаныш. Бұл аудан тұрғындары үшін үлкен қолдау. Аудан тұрғындарының еңбек сүйгіштігін, қарапайымдылығын, қайырымдылығын айтпай кетуге болмайды. Бүкіл әлемді жаулаған індет кезінде және кешегі су тасықыны кезіндерінде ауыз біршілігі пен бауырмалдықты, сабырлықты, ең бастысы қазаққа тән қанағатшылдықты көрсете білді.

Тәуелсіздігіміздің 30 жыл ішіндегі жетістіктерді бір парақ қағазға сыйдыру мүмкін емес. Жеткен жетістіктеріміз қаншама мақтап дәріптесек те жарасатын жасампаз істер жетерлік. «Тарихты тұлғалар жасайды» демекші бұл жетістіктерге жетуге Елбасымыз, Президентіміз бен аудан басшыларының еңбектері ерен. Келешекте ел тізгінін ұстайтын жастарымыз білімді, парасатты, иманды, мемлекетіміздің экономикасын, мәдениетін, әл-ауқатын көтеріп, бәсекеге қабілетті болсын. Жарқын болашаққа ізгі ниетпен, нақты мақсатпен бет түзеген Қазақстанымыздың болашағы жарық, жолы даңғыл алға дами берсін. Тәуелсіздігіміз тұғырлы келешегіміз баянды болсын.

Ш.ҚҰРБАНБАЕВА,

 Мақтаарал ауданы «Әжелер алқасының» төрайымы.