ҚР САУДА ЖӘНЕ ИНТЕГРАЦИЯ МИНИСТРІ АУДАНЫМЫЗҒА ЖҰМЫС САПАРЫМЕН КЕЛДІ

Қазіргі таңда Мақтаарал ауданы Өзбекстанның Сырдария және Жызақ облыстарындағы 4 ауданымен шектеседі. Ауданды көрші елмен байланыстырып тұрған «Атамекен» кедендік бекеті мен «Сырдария», «Целинный» шекара өткізу бекеттері арқылы күніне жүздеген жеңіл көліктер мен жүк көліктері барыс-келіс жасауда. Екі ел арасында бұдан да тығыз экономикалық қарым-қатынас орнату мүмкіндігі бар.  

Қазақстан Республикасының Тұңғыш Президенті – Елбасы Н.Ә.Назарбаев 2018 жылы «Орталық Азия» халықаралық сауда экономикалық ынтымақтастық орталығын құру туралы тапсырма берген болатын. Ал ағымдағы жылдың 26-қаңтарында Қазақстан Республикасының Президенті Қасым-Жомарт Тоқаев, Үкіметтің кеңейітілген отырысында Үкімет басшысына «Орталық Азия» халықаралық сауда экономикалық ынтымақтастық орталығын құру мәселесін жеделдетуді тапсырған болатын. Осыған байланысты күні кеше Қазақстан Республикасының Сауда және интеграция министрі Бақыт Сұлтанов және облыстық кәсіпкерлік және сауда басқармасының басшысы Нұрбақыт Иманқұлов пен Өзбекстан Республикасының осы салаға жауапты вице-министрлері де Мақтаарал ауданына жұмыс сапарымен келіп, шекара маңындағы бекеттердің жұмысымен танысты.

Министр мен басқарма басшысы «Целинный» және «Сырдария» шекара өткізу бекеттерін арнайы барып көріп, халықаралық сауда орталығын құру үшін нысандардың мүмкіндіктерін қарап шықты. Аудан әкімі Бақыт Асанов бекеттердің жұмысы мен мүмкіндіктері туралы кеңінен баяндады. Мәселен, «Целинный» шекара өткізу бекетіне жақын маңда «Сапар базарын» халықаралық деңгейде дамытуға болатынын айтты.

«Мақтаарал ауданында Ұлы Жібек жолының бір тармағы саналатын М-39 «Ташкент – Термез» бағытындағы магистрал дәлізі бар. Осы автомобиль жолының потенциалын пайдаланып, өңірде сауда-саттықты жоғары деңгейде дамытуға мүмкіндігіміз зор. Мәселен, бір кездері халықаралық деңгейде қызмет көрсеткен «бетонканың» бойындағы «Сапар базарын» халықаралық деңгейде қайтадан дамытсақ – өңірде мыңдаған адамды жұмыспен қамти аламыз» – деді Бақыт Насырханұлы.

Жалпы кәсіпкер Едіге Рахымбердиевке тиесілі «Сапар базарында» модернизациялау жұмыстары 2019 жылы жүргізілген болатын. Ол үшін кәсіпкердің жеке есебінен 100 миллион теңгеден аса қаражат жұмсалды. Соның арқасында тұтынушыларға жағдай жасалып, қосымша 100 адам жұмыспен қамтылды.

Министр «Атамекен» кедендік бекетінде де болды. Бұған дейін көрші елге өтпекші болған жүк көліктері кедендік бекет маңында кептеліске ұшырап, жол қатынасы қиындала түскен еді. Осы өзекті мәселені шешу үшін аудан әкімі Б.Асановтың бастамасымен кедендік бекеттің аймағын көріктендіру, көгалдандыру, кеңейту жоспары жасалды. Атап айтқанда, шекара маңынан сауда логистикалық орталығын құру, оның ішінде сауда базарлары, қонақ үй, автотұрақ, қоймалар, тұрғын үйлер мен түрлі спорттық алаңшаларды салу көзделіп отыр. Қазіргі таңда автотұрақ пайдалануға берілсе, кәсіпкерлердің есебінен басқа да нысандар салынуда.

Жұмыс сапарының қорытындысында барлық мән-жайға қанық болған министр Бақыт Тұрлыханұлы «Орталық Азия» халықаралық сауда орталығын құру үшін таңдалатын бекетке қатысты жан-жақты зерттеу жүргізіліп, шешім шығарылатынын айтты. 

Мақтаарал ауданы әкімінің баспасөз қызметі.