ЖОЛДАУДА ХАЛҚЫМЫЗҒА АСА ҚАЖЕТ НЕГІЗГІ МӘСЕЛЕЛЕР КӨТЕРІЛГЕН

      Қазақстан Республикасының Президенті Қасым-Жомарт Кемелұлы Тоқаев 2020-жылы 1-қыркүйекте Қазақстан халқына арнаған дәстүрлі Жолдауын жария етті. Осы аса маңызды саяси құжат Қазақстан Республикасының Парламенті палаталарының бірлескен отырысында «Жаңа жағдайдағы Қазақстан: іс-қимыл кезеңі» тақырыбында қалың жұртшылыққа ұсынылды.

       Елімізде жер-жаһанға зор қауіп төндірген пандемияға қарсы күрес әлі де жалғасуда. Біз азаматтардың өмірін және денсаулығын қорғау үшін бар күш-жігерімізді біріктірдік. Осындай сын сағатта ынтымағы жарасқан халқымыз жұдырықтай жұмылды. Індетпен күрес дана халқымызға тән асыл қасиеттердің арқасында жүзеге асты. Өзгеге қолұшын созып, тілеулес болу, тосыннан келген кеселге қарсы тұру маңызды екені анық байқалды.

          Дәрігерлерге, құқық қорғау органдарының қызметкерлеріне, әскери қызметшілерге, еріктілерге, кәсіпкерлерге және осындай шақта бейжай қалмаған барша азаматтарға шын жүректен алғыс айтамын. Сіздер айрықша табандылықтың және зор жауапкершіліктің жарқын үлгісін көрсеттіңіздер.  Бұны Отанға деген шынайы сүйіспеншіліктің көрінісі деп санаймын.

       Қазіргі күрделі жағдайда алдымызда тұрған басты міндет – әлеуметтік-экономикалық тұрақтылықты, жұмыс орындарын және халықтың табысын сақтап қалу.

        Дағдарысқа қарсы жедел шаралардың екі топтамасы қабылданды. Уақытша табыссыз қалған 4,5 миллионнан астам азаматымыз 42 500 теңге мөлшерінде көмек алды. Бұған 450 миллиард теңгеден астам қаражат жұмсалды. Осындай жәрдем көршілес елдерде, тіпті басқа ірі мемлекеттерде берілген жоқ.

           Миллионнан астам адамға азық-түлік және тұрмыстық заттар қоржыны берілді. Елбасы – Nur Otan партиясы Төрағасының бастамасымен 550 мыңнан аса отбасы «Біргеміз!» қорының қолдауымен біржолғы қаржылай көмекке ие болды. Біз азаматтарымыздың лайықты өмір сүруіне жағдай жасауға, олардың құқықтарын қорғауға, заң үстемдігін қамтамасыз етуге, жемқорлыққа қарсы күресті күшейтуге міндеттіміз.

         Ендеше, іс-қимыл жоспары қандай болмақ?

          Жолдау тақырыбы айтып тұрғандай, мемлекетіміз алдағы уақытта жаңа жағдайларға бейімделу және соған сәйкес іс-қимыл шараларын ұйымдастыру бағытында кезек күттірмес, шұғыл жұмыстарды атқаруы қажет. Экономикалық саясат пен даму кезеңдері бойынша Президент «Жаңа экономикалық бағыты негізгі жеті қағидадан тұруы тиіс» екендігін атап өтті.

      Біріншісі – табыс пен міндеттердің әділ бөлінуі.

      Екіншісі – жеке кәсіпкерліктің жетекші рөл атқаруы.

      Үшіншісі – әділ бәсекелестік, кәсіпкерліктің жаңа буынына нарықтардың ашық болуы.

      Төртінші – өнімділіктің өсімі, экономиканың күрделілігі мен технологиялық тиімділігінің артуы.

          Бесінші – адами капиталды дамыту, білім берудің жаңа түріне инвестиция салу.

         Алтыншы – жасыл экономиканы пайдалану, қоршаған ортаны қорғау.

       Жетіншісі – мемлекеттің негізі бар шешімдерді қабылдауы және сол үшін қоғам алдындағы жауапкершілік алуы.

       Негізгі міндеттеріміз:

– әлеуметтік маңызы бар азық-түлік тауарларымен өзімізді толық қамтамасыз ету;

– миллиондаған ауыл тұрғындарының табысын арттыру;

– еңбек өнімділігін екі жарым есе көбейту;

– агроөнеркәсіп кешені өнімінің экспортын екі есе арттыру.

        Шағын және орта бизнес күрделі кезеңді бастан өткеруде. Шын мәнінде, пан­демияның зардабы осы салаға ауыр тиді.

        Экономиканың шеккен зардабын еңсеру үшін 700 мыңнан астам кәсіп­кер­ге салық жеңілдіктері берілді. Төлем мер­зімі кейінге шегерілді, несиені жеңіл­дік­пен қайта қаржыландыру мүмкіндігі ұсы­нылды. Бірақ, ахуал әлі де болса күрделі.

        «Жолдау аясында ұйымдастырылатын шаралардың барлығы да қарапайым халықтың ертеңі үшін. Індет басталғалы еліміздің салт-дәстүрінде түрлі өзгерістер болып жатты. Оның жақсы тұстары да, жаман тұстары да бар. Ең жақсы тұсы – біз осынау қиын-қыстау заманда бір ұлт болып қалыптасқанымызды көрсеттік. Қайрымдылық, бір-бірімізге деген бауырмалдық, жомарттық деген үлкен қасиеттерімізді таныта білдік»

      Алдымызда ауқымды әрі күрделі мін­деттер тұр. Соларды табысты жүзеге асы­ру үшін тың тәсіл, жаңаша ойлау, жал­пы­ұлттық ынтымақ және өзара қолдау қажет. Баршамыз өз-өзімізді дамытуға күш салуымыз керек. Замана сынағы бізден үздіксіз қозғалысты, мықты күш-жігерді және табанды еңбекті талап етіп отыр.

        Біз төл тарихымызда тағдырдың түрлі сынынан әрдайым сүрінбей өттік. Еліміз ең күрделі деген міндеттерді шеше алады. Біз бұған дайынбыз.

       Келер жылы тәуелсіздігімізге 30 жыл болады. Бұл мерейлі дата – Егемен еліміз үшін аса маңызды меже. Бұл – жаңа тарихи кезеңнің басы.

         Осындай саяси мәні өте зор құжатта еліміздің бүгінгі мен ертеңі және баянды болашағы түгелдей, қамтылған. Ал ендігі кезекте Жолдау жүктелген міндеттерді толығымен, сапалы деңгейде орындау. Бұл істе тек қана мемлекеттік органдарға салмақ салып қою дұрыс емес. Жолдау міндеттері қалың көпшілік арқылы жүзеге асады, нәтижесі белгілі болады. Сондықтанда Қазақстан Республикасының Президенті Қасым-Жомарт Кемелұлы Тоқаевтың «Жаңа жағдайдағы Қазақстан: іс-қимыл кезеңі» тақырыбындағы Жолдауын қалың көпшілік, тұтас қазақстандықтар қолдап, қуаттауы керек. Баршамыз бірлесе отырып Жолдауды қолдайық құрметті замандастар!

Абдразакова Нұргүл Пердебайқызы,

Түркістан облыстық мәслихаттың депутаты және Түркістан облысы Кәсіпкерлер палатасының Мақтаарал аудандық филиалының директоры.