КІТАП ФЕСТИВАЛІ ӨТЕДІ

           1 маусым – Халықаралық балаларды қорғау күні орай,    ҚР Мәдениет және спорт министрлігінің қолдауымен ҚР Ұлттық академиялық кітапханасында «БалаTIME» кітап фестивалі өтеді. Кітап фестивалі биылғы жылы жарияланған Қазақстандағы  балалар мен жасөспірімдердің кітап оқуын қолдау жылы аясында ұйымдастырылып отыр.

             Фестиваль аясында күні бойы Фейсбук, Инстаграм парақшаларында «КІТАП ОҚЫП, РУХАНИ БАЙ БОЛ!»  республикалық онлайн-челленджі белгілі қоғам қайраткерлері, әртістер, оқырмандардың қатысуымен өтеді. Балалар әдебиетінің кітаптар көрме-жәрмеңкесі болады, оған Баянғали Әлімжанов, Толымбек Әбдірайым, Рустем Сауытбай, Акпар Разия, Ирина Әкімжанова сынды т.б. көптеген жекелеген балалар авторларымен қатар, «Самға», «Мұқаба», Steppe&World», «BRK press», «Фолиант»  баспалардың өнімдері де көрмеге қойылып, сол жерде авторлармен «Автограф  party» ұйымдастырылады деп көзделуде.

         Сағат 11.00-18.00-де  «Алтын сапа» сыйлығының лауреаты, «Құрмет» орденінің иегері, белгілі этнодизайнер Ырза Тұрсынзаданың тәлімгерлерінің қатысуымен «Көрпе fest – 2021» аясында «Ата кәсібі-бала нәсібі» мега көрме-жәрмеңкесі өтеді. Мақсаты – ұлттық қол-өнерімізді, төл кәсібімізді дәріптеп, болашақ ұрпақтың бойына сіңіру. ҚР атақты этнодизайнері Ырза Тұрсынзаданың YOUTUBE арнасындағы ақысыз онлайн дәріс сабақтары арқылы қәзіргі уақытта қазақ даласының ең кішкентай тәлімгерлерінің  жасы алты жастағы баладан ең үлкен тәлімгерлерінің жасы сексен бес жастағы аналар үйреніп жатыр. Бұл арнада тек қана қазақ даласының қыз-келіншектер емес бүкіл әлемнің 70-тен астам мемлекеттің әйел қауымы қатысып үйренуде. Іс-шараға Нұр-Сұлтан қаласы, Ақтөбе, Павлодар, Түркістан облысының қолөнер шеберлері офлайн және онлайн түрде қатысады. Қатысушыларға сертификат және сыйға кітап беріледі.  Сол сияқты, осы күні «Бүгінгі бала – ертеңгі көшбасшы» атты балалардың өзін-өзі басқару күні жоспарланып отыр. Бұл тәрбиелік мәні зор іс-шара аясында басшылық, ұйымдастыру, кітапханашы рөліндегі кішкентай оқырмандарымызға басқару ісінің қыр-сырын өз тәжірибесінде байқап көруге жол ашылады. Бұл іс шара «Менің таңдауым – кітап» ашық мінберімен тәмамдалады деп көзделуде.

           Фестиваль аясында белгілі суретші-иллюстратор Қайрат Жәйірбек пен танымал дизайнер Рахима Мукушеваның жеке көрмелерін өткізу жоспарлануда.

          Шараның ең басты іс-шарасы – кітапхана жанынан «Бала TIME» балалар телеарнасының салтанатты ашылуы болады. Балалардың өзі жүргізетін бұл телеарнаның қызықты танымдық бағдарламалары да осы салтанатты ашылуда көпшілікке паш етілмек. Фестиваль аясында фэнтези жанрының шебері Рустем Сауытбайдың «Шоко әлем» бестселлер кітабы және жазушы-драматург Маржан Ершудің «Кітапхана педагогикасы: Ертегітерапия» кітаптарының тұсаукесері өтеді. Сол сияқты, жас дарын Разия Акпар, жазушы Ирина Әкімжанова сынды шығармашылық тұлғаларының да кітаптарының тұсауы кесілмек.

        Іс-шаралар «Жас қаламгер» дөңгелек үстелімен тәмамдалады.

         Қатысушылар:  ҚР Парламенті Мәжілісінің депутаттары Бекболат Тлеухан, Бақытбек Смағұл, Берік Әбдіғалиұлы,   ҚР Ұлттық академиялық кітапхана басшысы, педагогика ғылымдарының докторы, профессор Үмітхан Мұңалбаева, «Алтын Орда» авторлық дизайн үйінің негізін қалаушы, ҚР Президентінің «Алтын сапа» сыйлығының лауреаты,  «Құрмет» орденінің иегері Ырза Тұрсынзада, айтыскер ақын Егеухан Мұқамәдиқызы, жазушы-сатирик Көпен Әмірбек, жазушы, жыршы-жырау Баянғали Әлімжан, балалар жазушысы Дария Джумагельдинова, ҚР Мәдениет қайраткері, әнші Ардақ Балажанова, балалар жазушылары, әдебиеттанушылар, мәдени мекемелерінің басшылары мен қызметкерлері, бизнес өкілдері, Нұр-Сұлтан қаласы және облыстардан келген қолөнер шеберлері, дарынды балалар, БАҚ өкілдері, блогерлер   кітапханашылар, оқырмандар. Одан басқа, осы атаулы күнге орай еліміздің ҚР Мәдениет және спорт министрлігіне қарасты 92 кітапханада 140-тан аса іс шара өтеді.

       Өтетін орны: Нұр-Сұлтан қаласы, Достық көшесі, 11, ҚР Ұлттық академиялық кітапханасы

Басталуы: 1 маусым, сағат 09.00-де.

ҚР ҰАК Баспасөз қызметі: 

тел.: 8 7789175156 Әсем

 эл.пошта: asemai1@mail.ru