АУДАН ӘКІМІ АППАРАТЫНЫҢ «НАМЫС» КОМАНДАСЫ ЧЕМПИОН!

         23 маусым – ҚР-ның Мемлекеттік қызметшілер күні қарсаңында Мақтаарал ауданының мемлекеттік қызметшілерінің арасында футболдан жарыс өтті. Аудан орталығы Мырзакент кентінің қақ төрінен жаңадан ашылған «Жалал ата» спорт кешенінде өткен дүбірлі додаға барлығы 10 команда қатысты.

        Жаңадан салынған спорт кешенінің ресми ашылуында сөз сөйлеген аудан әкімінің орынбасары Бейсенбай Төребеков жастарды спортқа баулитын осындай заманауи нысанды тұрғызғаны үшін Жаңажол ауылдық округі Өргебас ауылында тұратын Жалал Сапаров атаның ұрпақтарына аудан әкімдігінің атынан үлкен алғыс білдірді. Сонымен қатар, аудан әкімінің орынбасарымен бірге ел ағаларының бірі Ермекбай Байкөбеков пен «Нұр Отан» партиясының аудандық филиалының төрағасы Досым Асабаев жасыл алаңның лентасын қиды.

      Жалпы «Жалал ата» спорт кешені әлемдік стандартқа сай 40х20 метрге жасанды газон төселген. Заманауи спорт кешенінде киім ауыстыратын бөлмелер, душ, күту залдары орналасқан. Кешеннің аумағы толықтай профнастилмен жабылып, жылдың 4 мезгілінде де спортсүйер жандарға қызмет көрсетуге дайын.

       Нысанның ресми лентасы қиылған соң жарысқа қатысушы командалар салтанатты түрде таныстырылып, мерекелік жарыс ресми түрде ашылды. Мақтаарал ауданы әкімі аппаратының басшысы, аудандағы мемлекеттік органдардың Әдеп жөніндегі уәкілі Нұрбол Саттаров жарысқа қатысушыларға сәттілік тілеп, мемлекеттік қызметшілер күнімен құттықтады. Мұнан соң ҚР-ның Әнұраны ойнап, көк туымызға қарай сап түзеген мемлекеттік қызметшілер жарысқа толық дайын екендіктерін көрсетті.

        Өте тартысты әрі қызықты өткен жарыстың нәтижесімен аудан әкімінің орынбасары Сәкен Сұлтанханов капитандық еткен Мақтаарал ауданы әкімі аппаратының «Намыс» командасы І орынды алып, жарыстың чемпионы болды. Ал, Жаңажол мен Еңбекші ауылдық округі әкімі аппараттарының мемлекеттік қызметшілерінен құралған «Қыран» командасы ІІ орынды, Ж.Нұрлыбаев пен А.Қалыбеков ауылдық округі әкімі аппараттарының мемлекеттік қызметшілерінен құралған «Қайрат» командасы ІІІ орынды иеленді.

       Жеңімпаздарды мараппаттау рәсімінде шеберлігімен, сұрмергендігімен көзге түскен үздік ойыншылар да аталып өтті. Аудан әкімінің орынбасары Сәкен Сұлтанханов, аудандық тұрғын үй-коммуналдық шаруашылық, жолаушылар көлігі және автомобиль жолдары және тұрғын үй инспекциясы бөлімінің басшысы Ғабит Полатов, Ж.Нұрлыбаев ауылдық округінің бас маман – салық агенті Еламан Жақыпбаевтар «Үздік ойыншы» атанса, Мәдениет және тілдерді дамыту, спорт және дене шынықтыру бөлімінің бас маманы Досбол Жүнісов «Үздік қақпашы» атағына лайық деп табылды.  

 Мақтаарал ауданы әкімдігінің баспасөз қызметі.