ТИІМДІ МӨЛШЕРЛЕМЕМЕН НЕСИЕ РӘСІМДЕЙ АЛАДЫ

Түркістанда «Atameken Turkistan» микроқаржы ұйымы құрылды
«Бастау Бизнес» жобасы аясында бизнес-жоспарын қорғаған Мақтааралдықтар микроқаржы ұйымынан жылдық 6% мөлшерлемемен несие рәсімдей алады.
Түркістан облысы кәсіпкерлер палатасы директоры Тимур Нақыпбеков айтуынша, «Аtameken Turkistan» МҚҰ «Бастау» түлектерінің жобаларын қаржыландыруға бағытталған.
«Кәсібін енді бастап жатқан азаматтар, «Бастау» жобасының түлектері несие рәсімдеуге құжаттарын жинап, несие алуға өтінімдерін беру қажет. Олар бірнеше салада несие ала алады. Шағын несиені 5 жылға, ал мал шаруашылығы саласында 7 жылға дейінгі дейін рәсімдеуге болады. 2021 жылы ауылдық елді мекендер мен шағын қалалар үшін қарыздың ең жоғары соммасы 7,2 млн теңге, қалалар мен моноқалалар үшін 18,9 млн теңгеге дейін беріледі», – деді Тимур Нақыпбеков.
Тек микроқаржы ұйымы несиені тұтынушылық мақсатқа, бұрын алған несиені өтеу, несие берешегін қайта қаржыландыруға, жылжымайтын тұрғын үй, жеке тұрғын үй құрылысы үшін жер учаскелерін сатып алуға бермейді.
Несиеге өтінім беру үшін белгіленген формадағы несие беруге өтініш және клиенттің сауалнамасы болуы керек. Мұнан өзге жеке кәсіпкерлікті немесе заңды тұлғаны мемлекеттік тіркеу туралы куәлік, өтінім берушінің жеке куәлігі, несие тарихы, банктер мен салық органдарында берешегі жоқтығы туралы анықтамалар, кепілмен қамтамасыз етуге арналған құжаттар болуы керек.
Ауылдық жерде тұратын азаматтар Кәсіпкерлер палатасының аудандық филиалына арқылы өтінім бере алады.
Түркістан облысы Кәсіпкерлер палатасының Мақтаарал аудандық филиалына келіп өздеріңізді қызықтырған сұрақтар бойынша толық мәлімет ала аласыздар. Мекен жайымыз: Мақтаарал ауданы, Жеңіс көшесі 10, «Nur Otan» ғимаратының 3-қабаты.