ҰСЫНЫСТАР АУДАН БАСШЫСЫНЫҢ ТІКЕЛЕЙ НАЗАРЫНДА БОЛАДЫ

      Аудан әкімі Қадырбек Мұрат Болатұлы Қарақай ауылдық округінің  тұрғындарымен кездесті. Кездесуде Қарақай ауылдық округі аумағындағы  ауыл шаруашылығы дақылдарын ағын сумен қамтамасыз ету және ағын су тарифі мәселелері  талқыланды. Көтерілген мәселелерге байланысты «Қазсушар» РМК ТОФ Жетісай өндірістік бөлімшесінің қызметкері ауданда су шаруашылығы саласында (ауыл шаруашылығы дақылдарына ағын судың босатылу барысы, ағын судың тарифі жайлы және т.б.) атқарылып жатқан жұмыстарының барысы қысқаша айтылып, шаруалар тарапынан қойылған сұрақтарға жауап берді.                 Жалпы егістік жер көлемі 6858 га құрайтын Қарақай ауылдық округінде қазіргі таңда 4666,8 га мақта, 1029,5 га бақша, 220 га көкөніс, 375 га дәндік жүгері, 200 га жаңа жоңышқа, 245,7 га ескі жоңышқа, 60 га күріш егілген. Егістік алқаптың 3900 га жері суғарылып, Қараөзек  ауылындағы АВ-01, АВ-1, АВ-03, АВ-11 және Қарақай ауылындағы ДВ-2-1, ДВ-04 қашыртқылары, аудандық «Қазсушар» РМК филиалы тарапынан жоспарға сәйкес механикалық тазалаудан өткізілген.

      Кездесуде тұрғындар тарапынан елді мекен ішіндегі істен шыққан тік дренаждар қалпына келтіру және іске қосу, көше бойларын жарықтандыру, ішкі жолдарды орта және ағымдағы жөндеуден өткізу, аяқ жол салу мәселелерімен қатар ауыз судың да жағдайын тілге тиек етті.

        Округтегі Сәтбаев, Қарақай және Еңбек елді мекендерінің ауыз су жүйелеріне 22,9 млн теңге қаржы қаралып, құрылыс жұмыстары келесі жылға өтпелі. Оның 3 млн теңгесі бікітілген жоспарға сайкес «Жетісайсу» мекемесі арқылы жыл соңына дейін толық игеріледі деп күтілуде. Одан бөлек, округтің ауыз суын орталықтандырылған «Абай» топтық су жүйесіне қосу, ауыз су мұнарасына жаңа су сорғыш орнату жұмыстары да жүргізіліп жатыр. Сонымен қатар, басқосуда округ жастарының бос уақыттарын тиімді ұйымдастыру мақсатында 150 орындық ауылдық клуб салу, спорттық-мәдени орталықтарды іске қосу мәселелері де назардан тыс қалмады.

        Аудан басшысы мәселелерге заңды түрде жауап беріп, тиісті бөлім басшыларына тапсырмалар берді. Әкімдік тарапынан өз ісіне жауапсыздық танытқан бөлім басшылары мен ауыл әкімдеріне тиісті шаралар көрілетіндігін жеткізді.

        «Айтылған әрбір өтініш-пікірлеріңізді хаттамаға енгізіп, мүмкіндіктерін заң аясында қарастырамыз. Тиісті сала мамандарына тапсырмалар берілді. Тапсырмалардың орындалуын жеке бақылауыма аламын» – деді Мұрат Болатұлы жиын соңында.

Бауыржан НАЙМАНОВ.