ЭКО-СЕНБІЛІК ӨТТІ

Мақтаарал ауданында эко-сенбілік болып өтті. Аудан әкімінің аппараты бастаған ауданның дербес бөлімдері мен кенттердің, ауылдық округтердің әкімдіктері, дербес бөлімдерге қарасты коммуналдық мекемелердің қызметкерлері ауданның кіреберіс қақпасынан бастап Сырдария өзеніне дейінгі 10 км-ге жуық аралықты түгелдей күл-қоқыстан тазартты.

          Аталған аймақтағы А-15 автожолы – Мақтаарал, Жетісай аудандарының тұрғындарының Шымкент қаласына қатынайтын бірден бір бағыты. Жүк көліктері, қоғамдық көліктер мен жеңіл көліктер көп жүретіндіктен, жол бойында әсіресе сусындардың, спирттік ішімдіктердің бөтелкелері, темекенің қораптары сияқты ондаған жылдар бойы шірімейтін қалдықтар қаптап кеткен.

            «Сіз тастаған сағыз тұрған жерінде 5 жылға дейін өңін бұзбай жатады. Ал пластикалық негізде өндірілген тауарлар 50-100 жылдың арасында, пластикалық құтылар және қаңылтыр банкалар 500, балық қармағының жібі 600 жылда жойылады. Бүгінгі сенбілік барысында негізінен осындай ұзақ жылдар бойы шірімейтін қалдықтарды тазарттық. Табиғи ортада ұзақ жылдар сақталатын қоқыстар ауаны ластап, нәтижесінде қатерлі ауру тудыратынын белгілі. Сондықтан, тазалық мәдениеттің көрсеткіші десек, Мақтаарал, Жетісай аудандарының тұрғындарын мәдениетті болуға шақырамын!» – деді аудан әкімі Бақыт Асанов.

         Айта кетейік, эко-сенбілік барысында  500-ден астам адам, 8 техника жұмылдырылып, 120 куб күл-қоқыс шығарылды. Мұндай тазалық шаралары алдағы уақытта жалғасын табатын болады.

 Мақтаарал ауданы әкімдігінің баспасөз қызметі.