САЙЫПҚЫРАН.KZ Ақпаратты-сараптамалық порталы АҚПАРАТ ӘЛЕМДІ БИЛЕЙДІ!
Жетісай ауданының адами әлеуетті дамыту бөліміне қарасты «С.Сейфуллин» атындағы №52 жалпы орта мектебінде Қазақстан Республикасы Тәуелсіздігінің 30 жылдығына орай «Шынықсаң шымыр боласың» атты ТОЛАҒАЙ эстафеталық сайысы болып өтті.
Аудандық жұмыспен қамту және әлеуметтік бағдарламалар бөлімінің басшысы Әділхан Әбжанов, аудандық мәслихат аппаратының басшысы Сұңғат Амангелдиев, аудандық мәслихат депутаттары Рүстем Наматуллаев пен Айбек Сұлтанмұратов, Хадиша Қожбанова мен Ғазиза Шүкірбаева, Жетісай ауданының адами әлеуетті дамыту бөлімінің әдіскері Ғалымжан Боранбаев қатысқан спорттық-топтық сайыс бұл жолы оқушылар емес, ұстаздар арасында өтті.
Негізгі мақсаты жас ұстаздар арасында салауатты өмір салтын насихаттай отырып олардың жұмыстан тыс уақыттарында бой сергітулеріне жағдай жасау, топтасып жұмыс жасауға дағдыландыру, артықшылығын ұғындыру, Тәуелсіздіктің қадір-қасиетін, жетістіктерін кеңінен насихаттау болып табылатын сайысқа Ж.Ералиев ауылдық округінде орналасқан 7 жалпы орта мектептен 7 команда қатысты.
Жарыс «Сәлемдесу», «Кедергілерден өтіп, шар жару», «Қаппен жарыса секіру», «Секіртпемен жүгіру», «Ұзындыққа секіру», «Кір тасын көтеру» және «Арқан тартыс» секілді бөлімдерден тұрды.
Спортпен үнемі айналысып, ұрпағының қамын ойлаған адам ғана қоғамның толыққанды белсенді мүшесі болмақ. Бұл тұжырымға тартысты өткен сайыс барысында толық көз жеткіздік. Өйткені, 7 бөлімнен тұратын сайыстың алғашқы кезеңдерінен бастап жеңіске деген жігері мен үлкен дайындықтарын көрсете білген командалар көрермендердің құрметіне бөленді.
«Бұл сайысты өткізудегі негізгі ойымыз – жас мұғалімдер арасында достық қарым-қатынасты нығайтып, салауатты өмір салтын насихаттау, ел Тәуелсіздігінің қасиетін ұғындыру болып табылады» дейді «С.Сейфуллин» атындағы №52 жалпы орта мектебінің директоры, аудандық мәслихат депутаты Ғазиза Шүкірбаева.
Салауатты өмір салтын ұстанған жас отбасылар арасындағы сайыста жеңіске жетіп, ептілік танытқан 301 ұпаймен «С.Сейфуллин» атындағы №52 жалпы орта мектебі І орынды иеленсе, ІІ орын 299 ұпаймен «М.Мақатаев» атындағы №47 жалпы орта мектебінің, ІІІ орын 280 ұпаймен «Р.Қошқарбаев» атындағы №50 жалпы орта мектебінің командаларына бұйырды. Ал, ІV орынға 268 ұпаймен «Сырдария» атындағы №49 жалпы орта мектебі, V орынға 245 ұпаймен «Дәуір» атындағы №51 жалпы орта мектебі, VІ орынға 244 ұпаймен «Қ.Сәтпаев» атындағы №48 жалпы орта мектебі табан тіресе, VII орын 200 ұпай жинаған «Ә.Қастеев» атындағы №46 жалпы орта мектебі ұстаздарының еншісіне тиді.
««Спорт – денсаулық кепілі» деген қағиданы берік ұстанған ұстаздар бұл сайысқа жақсы дайындықпен келіп, жоғары деңгейде өтуіне атсалысты. Мұндай сайыстарды ұстаздар арасында жиі өткізіп тұруды жөн көріп отырмыз. Өйткені, саламатты ұрпақ тәрбиелеуде салауатты өмір салтын ұстанудың маңызы зор.
Ерекше айта кететін жәйт – бүгінгі жарысқа қатысушылардың басым көпшілігі Тәуелсіздіктің құрдастары» деген Жетісай ауданы адами әлеуетті дамыту бөлімінің алғашқы әскери және технологиялық дайындық, дене шынықтыру пәндерінің әдіскері Ғалымжан Боранбаев алдағы уақыттарда «Толағай» топтық сайысын округ мектептері арасында, жеңімпаздарын аудандық деңгейде жүздестіру жоспарда бар екенін айтады.
Жарыс соңында жеңімпаз командалар мен өзге де қатысушылар ұйымдастырушылар тағайындаған кубоктар мен дипломдарға, бағалы сыйлықтарға, аудандық дене шынықтыру және спорт бөлімінің басшысы Еркебұлан Сейдалиевтің алғыс хаттарына ие болды.
Бауыржан НАЙМАНОВ,
Жетісай ауданы.
