ЖЕТІСАЙЛЫҚ ДИҚАНДАР 28 ГЕКТАР АЛҚАПҚА КАУЫН ЕКТІ

        Еліміздің өзге өңірлеріне қарағанда көктемі ерте келетін Жетісай ауданында жетісайлық дихандар ақпан айының соңында қауын егуді бастады.

           Егістікке ерте тұқым сеуіп, бүгінде күтіп-баптау жұмыстарын жүргізіп отырғандардың бірі Жұлдызхан Нұрмахан. Жалпы иелігінде 150 гектар жері бар Жетісай ауданы Ынтымақ ауылдық округінде орналасқан «Nur Daut» шаруа қожалығы бүгінгі таңға дейін 28 гектарға қауынның ерте пісетін “Аэропорт” сортын еккен. Одан бөлек 30 гектарға егілген қырыққабат ауа-райының қолайлылығы мен күтімнің дұрыстығынан түйнеп үлгерген.

         «Он жылдан бері отбасымызбен диханшылықпен айналысамыз. Негізгі күн көрісіміз де осы. Мұнда қазір 100 адам жұмыс істеп жатыр, жұмысшыларға күніне 3500 теңгеден еңбекақысын төлеп отырмыз. Құдай қаласа 3 айдың көлемінде еккен егініміз пісіп, дайын болады. Егілген көшеттің үстін жапқышпен жауып, жауын-шашыннан қорғаймыз. Ең бастысы – күтіп-баптауға үлкен мән берілуі керек» деді шаруашылық төрағасы Нұрмахан Жұлдызхан.

          Айта кетейік, Жетісай ауданы бойынша егіс егілуі тиіс 78 500 гектардың 48 мың гектарына мақта шиті егіледі деп жоспарлап отырмыз. Жалпы былтыр Жетісай ауданы бойынша 21 мың гектарға бақша дақылдары егіліп, тиісінше 600 мың тонна өнім алынған.
“Қазіргі таңда шаруаларға көктемгі дала жұмыстарын жүргізу үшін 7 мың тонна жеңілдетілген жанар-жағар май бөлінді.

           Алдағы уақытта шаруаларға берілетін болады» дейді Жетісай ауданы ауыл шаруашылығы мен жер қатынастары бөлімінің бас маманы Нұртас Тұрсынбеков.

Бауыржан НАЙМАНОВ, Жетісай ауданы.