ЖЫЛЫ СУДА 25 КӨШЕ АСФАЛЬТТАНАДЫ

        Мемлекет басшысы Қасым-Жомарт Кемелұлының «Халық үніне құлақ асатын мемлекет» тұжырымдамасы аясында және билік пен бұқара арасындағы байланыстың ашықтығын нығайту, қоғамды одан әрі демократияландыру мақсатында Жетісай ауданының әкімі Мұрат Болатұлы бекітілген кестеге сәйкес Жылы су ауылдық округі тұрғындарымен Әл-Фараби елді мекенінде кездесу өткізді.

       №41 Х.Доспанова атындағы жалпы орта мектебінің ауласында ашық аспан астында басқосуға аудандық мәслихат депутаты Рүстем Наматуллаев пен Түркістан облыстық «Парвиз» этно-мәдени орталығының төрағасы Юлдаш Сұлтанов, аудан әкімінің орынбасары мен дербес бөлім басшылары, тиісті сала мамандары мен округ тұрғындары қатысты.

         Ашық жүздесуде аудан басшысы жыл басынан бері атқарылып жатқан жұмыстар жөнінде баяндама жасап, алдағы атқарылатын жұмыстар мен жобаларға тоқталды. Сонымен қатар, кездесуде Мұрат Болатұлы халықты толғандырған әлеуметтік мәселелерге баса назар аударып, ауылдық округтегі II тоқсанда кездесу барысында көтерілген өзекті мәселелердің орындалу барысымен таныстырды.

        Жылы су ауылдық округі бойынша жалпы ұзындығы 57,94 шақырымды құрайтын 68 ішкі көше орналасқан. Округ аумағындағы жөндеуді қажет ететін ішкі көшелерге бюджеттің мүмкіндігіне сәйкес орташа және ағымдағы жөндеу жұмыстары кезең-кезеңімен жүргізілуде. Атап айтқанда, 2022 жылы «Ауыл – ел бесігі» бағдарламасы бойынша 371 млн 404 мың теңгеге ауылдық округтегі Жылы су, Баққоныс және Байқоныс елді мекендеріндегі жалпы ұзындығы 18,9 шақырымды құрайтын 23 көшеге орташа жөндеу (асфальт төсеу) жұмыстары жүргізілуде. Бүгінгі таңда 11 көшенің құрылысы аяқталып, пайдалануға берілген.

        Ал, жергілікті бюджет есебінен 29 млн 113 мың теңгеге жалпы ұзындығы 1,13 шақырымды құрайтын Мырзашоқы елді мекеніндегі Береке және Баққоныс елді мекеніндегі Ақбұлақ көшелеріне орташа жөндеу және 18 млн 880 мың теңгеге Сейфуллин елді мекенінен Кәрім ата ауылына дейінгі аралыққа ұзындығы 1,6 шақырымды құрайтын жаяу жүргіншілерге арналған аяқжол салу жұмыстары жоспарланған.

       Баққоныс елді мекенінен спорт алаңшасын салу үшін қазіргі таңда жер телімі қарастырылуда. Арнайы жер телімі анықталған соң спорт алаңшасын салуға тиісті жұмыстар жүргізілетін болады.

        Кездесу соңында аудан басшысы округ тұрғындарына жеке мәселері бойынша қабылдау өткізіп, қойылған сұрақтар мен көтерілген мәселелерге жауап берді.

Бауыржан НАЙМАНОВ, 

Жетісай ауданы.