САДАҚ АТУ КЕШЕНІ АШЫЛДЫ

        25 қазан – Республика күні қарсаңында Мақтаарал ауданында ашық аспан астында тұңғыш рет «Мырзакент» садақ ату кешені ашылды. Мұнда балалар мен ересектер ұлттық спорт түрімен еркін айналыса алады.

        Қ.Мұңайтпасов орталық стдаионының аумағында орналасқан нысанның ашылуына аудан басшысы, құқық қорғау органдарының басшылары, ардагер ақсақалдар мен тұрғындар қатысты.

        Дәстүрімізді жаңғыртып, рухымызды оятып, мақтааралдықтарға садақ атуды үйрететін кешенді ашуға қожалық төрағасы, жеке кәсіпкер Жанболат Жақсылықұлы демеушілік көрсетті.

      Жиында сөз сөйлеген аудан әкімі Бақыт Асанов әкенің бала алдындағы міндеті садақ ату екенін атап өтіп, барша тұрғындарды жаңа спорттық нысанның ашылуымен құттықтады.

      Адамзат қоғамы дамуының алғашқы кезінен аң аулауда, сондай-ақ оқпен атылатын қарулар шыққанға дейін соғыста кеңінен қолданылған садақ ату — мергендік спортының бір түрі. 1900 жылдан бастап жазғы Олимпиада ойындарының тізіміне кірген. Шыдамдылық, жүйке мықтылығы, өткір көз және қуатты қол – осының барлығы садақпен атқанда жеңіске жету үшін қажет. Бүгінгі күні осы спорт түрімен әлемнің 140 елінде спортшылар айналысады.

        Айта кетсек, елімізде садақ тарту спорты 1967 жылдан бастап дами бастады. 2021 жылдан бастап бұл дәстүрлі спорт түрі болып белгіленді.

 Мақтаарал ауданы әкімдігінің баспасөз қызметі.