АТАҚТЫ «ТURAN» АНСАМБЛІ «FOLK & SYMPHONY» ЖОБАСЫМЕН АЛМАТЫДА

    Өтетін күні мен уақыты: 23 ақпан, сағ. 17:00 – баспасөз конференциясы, сағ.19.00 – концерттің басталуы.
    Өтетін жері: Алматы қаласы, Ш.Қалдаяқов көшесі 35, Жамбыл атындағы Қазақ мемлекеттік филармониясы.

«Роза Бағланова атындағы «Қазақконцерт» мемлекеттік концерттік ұйымының солистері  – «ТURAN» фольклорлы-этнографиялық ансамблі, арнайы Алматы жұртшылығы үшін «FOLK & SYMPHONY» жобасын ұсынады.

        Аталмыш кеш ансамблдің 15 жылдық мерекесіне орай ұйымдастырылған алғашқы концерті болмақ.
«FOLK & SYMPHONY» – симфониялық оркестр мен қазақтың көне музыкалық аспаптарын біріктіріп, Америка, Еуропа және Азия тыңдармандарының жүрегін жаулаған «TURAN» фольклорлы-этнографиялық ансамблінің бірегей жобасы. Бұл жоба қазақтың музыка мәдениетін сақтауға, дамытуға және танымал етуге бағытталған.

        Концерттік бағдарламада «ТURAN» ансамблінің репертуарындағы фольклорлық және симфониялық үздік туындылар орындалады. Атап айтатын болсақ, «Бүркіт», «Сырласу», «Ақсақ Құлан», «Аққу», «Ортеке», «Толғау», «Ұлы Тұран мәңгілік», «Қара жорға», «Көроғлы, «Ер Тұран» және т.б. композициялық шығармалар көрермендер назарына ұсынылады. Іс-шара екі бөлімнен тұрады.

       Концерттік шара Т.Әбдірашев атындағы ҚР Мемлекеттік академиялық симфониялық оркестрінің көркемдік жетекшісі және бас дирижері Қанат Омаровтың басқаруымен өтеді.

       Т.Әбдірашев атындағы ҚР Мемлекеттік академиялық симфониялық оркестрі – 1938 жылы құрылған еліміздегі алғашқы симфониялық оркестр, Қазақстанның ең ірі әрі жетекші музыкалық ұжымы. Чехия, Польша, Германия, Австрия, Франция, Ұлыбритания, Америка, Түркия, Корея, Қытай елдерінің композиторларымен, көрнекті дирижерлерімен авторлық концерттік кездесулер ұйымдастырып, әлемдік деңгейдегі көптеген орындаушылармен бірге өнер көрсеткен.

         2015 жылдан оркестрдің көркемдік жетекшісі жəне бас дирижері болып қызмет ететін Қанат Омаров Қазақстанның халық әртісі, профессор, отыз жылға жуық Мемлекеттік академиялық симфониялық оркестрдің бас дирижері болған Төлепберген Әбдірашевтен тәлім алып, лайықты деңгейде ізін жалғастырып келеді. Сонымен қатар, «Метрополитен» опера театрының бас дирижері, әлемге әйгілі маэстро – Фабио Луизиден тағылымдамадан өтіп, мамандығының қыр-сырын игерді.

      «ТURAN» фольклорлық-этнографиялық ансамблі әлемнің 70-ке жуық елдерінде 1300-ден астам жеке концерттерін өткізді. 2022 жылы ансамбль Түркия президенті Режеп Тайип Ердоғанның шақыртуымен және Бакудегі XIV У.Гаджибейли сондай-ақ, Сеулдегі «Asia Song Festival» халықаралық музыка фестивалінде өнер көрсетіп, Әзірбайжан мемлекетінде өткен ІІ Яилаг халықаралық фестивалінің арнайы қонағы болды. Ансамбль «Mendirman Jaloliddin» атты түрік тарихи сериалының екінші маусымына саундтрек жазды. Айта кетейік, «TURAN» ансамблі бұған дейін «Diriliş Ertuğrul» (реж: Mehmet Günay, Түркия), «İsimsizler» (реж: Emre Konuk, Түркия), «Дала дауысы» (реж: Ермек Шынарбаев, Қазақстан-Франция) және т.б. халықаралық жобаларға музыка жазған болатын. 15 жылдық мерекеге орай әлемдік турне бойынша ансамбль шет мемлекеттерге концерттік бағдарламаларымен шығуды да жоспарлап отыр.

         Шығармашылық ұжым «Карнеги Холл» (Нью-Йорк, АҚШ), «Кеннеди орталығы» (Вашингтон, АҚШ), «Концерт үйі» (Берлин, Германия), «Кремль сарайы» (Мәскеу, Ресей), Санкт-Петербургтегі «Мариин театрының концерттік залы» (Ресей), «Конгресстер мен фестивальдер сарайы» (Канн, Франция), «Салле Корто» (Париж, Франция) сияқты атақты залдарда өнер көрсетті.

        «ТURAN» ансамблі – 2008 жылы құрылған, заман талабына сай қазақ халқының ұлттық музыкалық мұрасын дамытып, көне аспаптардың үнін жаңа үлгіде жаңғыртуға атсалысып жүрген өзіндік ерекшелігі бар өнер ұжымдарының бірі. Сондай-ақ, түркі әлеміне ортақ көмеймен ән айту өнерінің шеберлері. Ансамбль құрамында 30-дан астам ұлттық аспаптарда ойнайтын өнерпаздар  – Мақсат Медеубек, Серік Нұрмолдаев, Бауыржан Бекмұханбетов, Ержігіт Әлиев, Жанту Дадабаев пен т.б. бар.

      Ерекше әсер сыйлайтын әдемі кештен қапы қалмаңыздар! Біз сіздерді күтеміз, құрметті көрермендер!

Роза Бағланова атындағы «Қазақконцерт»
мемлекеттік концерттік ұйымының баспасөз қызметі.