ОҢАЛТУ ОРТАЛЫҒЫНДА «АШЫҚ ЕСІК КҮНІ» ӨТТІ

         Жетісай ауданының жұмыспен қамту және әлеуметтік бағдарламалар бөлімінің «Психоневрологиялық ауытқуы бар және тірек-қимыл аппараты бұзылған мүгедек балаларға арналған «Үміт ұясы» күндіз болу орталығы» мекемесінің 5 жылдығына орай «Ашық есік» күні және «Наурыз» мерекесі аталып өтті.

         Мерекелік шараға аудандық жұмыспен қамту және әлеуметтік бағдарламалар бөлімінің басшысы Әділхан Әбжанов пен Асықата кентінің әкімі Бақыт Серіков, қызмет алушы балалардың ата-аналары қатысты. Мерекенің көркі болған наурыз көже таратылып, ән мен күйге ұласты.

         Ашылған күннен күні бүгінге дейін атқарылған жұмыстары мен жеткен жетістіктерін ата-аналарға таныстыру мақсатында ұйымдастырылған шарада ата-аналар мекеме мамандарының сабақтарына қатысып, балаларға жүргізіліп отырған емдік шараларға ризашылықтарын білдірді.

           Бүгінде аталмыш орталықта 40 бүлдіршінге күйзелістен шығару үшін дәрігер педиатор, неврапотолог, логопед, психолог, дефектолог, еңбек, музыка, массаж, емдік дене шынықтыру және дене шынықтыру бағыттары бойынша 21 маман бар. Сауықтыру және әлеуметтік, оңалту емдік шараларын өткізуге бағытталған қажетті арнаулы әлеуметтік қызметтер кешенін ұсыну арқылы жан-жақты көмек көрсетілуде.

Бауыржан НАЙМАНОВ, Жетісай қаласы.