ӘЛЕУМЕТТІК ЖЕЛІДЕ ЖАППАЙ ТАРАЛҒАН ОҚИҒА БОЙЫНША БАСПАСӨЗ МӘСЛИХАТЫ ӨТТІ

            Жиынға аудандық мәслихаттың хатшысы Қадір Сәрсекбаев, аудан әкімінің орынбасары Алтын Ешанқұлова, «Amanat» партиясының аудандық филиалының хатшысы Мұхтар Сәрсенов және БАҚ өкілдері, әлеуметтік желілердің белсенділері қатысты.

           Қ.Сәрсекбаев әлеуметтік желілерде таралып жатқан ақпараттардың басым бөлігі жалған ақпараттардан құралғанын атап өтті. Оның ішінде аудандық мәслихаттың депутаты әрі «Мырзакент қызмет» МКК-нің басшысы Т.Адамбеков ешқандай құқық бұзушылыққа қатыспағанын, керісінше қос тарапты келісімге шақырып, ажыратуға тырысқанын жеткізді.

           Аудан әкімінің орынбасары А.Ешанқұлова болған оқиға ешқандай ұлтараздық сипат алмағанын, екі тарап бір-бірін бала күнінен танитынын айтты. Сондай-ақ, БАҚ өкілдері мен әлеуметтік желі белсенділеріне оқиғаның анық-қанығына толық көз жеткізіп барып қана ақпарат таратуды сұрады және жалған ақпарат таратып ушықтырмауға шақырды.

         «Оқиғаға қатысқан азаматтардың барлығы да қазақтар, оның ішінде Мырзакент кентінің тұрғындары. Қамауға алынған А. есімді азамат пен ауруханаға түскен Т. есімді азаматтар бір-бірлерін бала күннен таниды. Тіпті, рулас ағайын болып келеді. Сондай-ақ, Т.Адамбеков депутаттық мансабын пайдалану мақсатында емес, орталық алаңға жауапты мекеменің басшысы ретінде сол жерде болғанын атап өткен жөн» – деді, А.Күнтуқызы.

          Баспасөз мәслихатында ұйымдастырушылар мен БАҚ өкілдері арасында еркін форматта сұхбат өрбіп, сұрақтарға жауаптар берілді. Оқиғаның мән-жайына, шындығына тілшілер қауымы толық көз жеткізді.

         Айта кетейік, қазіргі таңда екі азаматқа да қатысты ҚР ҚК-нің 106-бабы 2-бөлігі  «Денсаулыққа қасақана ауыр зиян келтіру» мен ҚР ҚК-нің 293-бөлігі «Бұзақылық» бойынша сотқа дейінгі тергеу жүріп жатыр.

 Мақтаарал ауданы әкімдігінің баспасөз қызметі.